Министерот за надворешни работи Бујар Османи учествуваше на министерски состанок за унапредување на слободата на религиите на покана на неговиот полски колега Збињев Рау.
– Силно сме посветени на почитување и заштита на слободата на религиите и убедувањата, преку стриктно утврдена легислатива преку која се гарантираат овие основни човекови права. Во таа насока, преку институционалните структури вршиме нивна промоција, заштита и унапредување на национално ниво, истакна Османи на онлајн состанокот.
Од Кабинетот на министерот Османи информираа дека тој ги презентирал активностите што Владата ги превзема и на меѓународен план за промоција на слободата на религијата и потсетил дека почнувајќи од 2007 година, Република Северна Македонија, на секои три години, организира меѓународна конференција посветена на дијалогот меѓу цивилизациите и религиите, како потврда за мултирелигискиот и мултикултурниот карактер на земјата.
На состанокот со консензус од страна на учесниците се усвоени неколку заеднички изјави посветени на унапредување на меѓурелигискиот дијалог, заштитата на малцинските религиозни групи, придонесот на религиозните актери кон градењето на мирот и слично.
Целта на состанокот, како што се наведува во соопштението, произлегла од потребата од енергично јакнење на напорите на меѓународен план за справување со злоупотребата на религиите во криминални цели, како и од потребата за нивна заштита, негување и почитување.
