Шпанскиот фудбалски прволигаш Барселона планира да достави до Баерн Минхен нова понуда за полскиот напаѓач Роберт Левандовски, објави денеска германскиот весник „Билд“, jaвува МИА.
Новата понуда би можела да се најде на масата веќе пред крајот на оваа седмица. Првата понуда која Барселона ја испрати за услугите на Левандовски изнесуваше 32 милиони евра, сума која Баерн ја оцени како недоволна.
Раководството на Баерн инсистираше дека нема да му дозволи да замине на Левандовски, кој има важечки договор до идното лето, но полскиот репрезентативец изјави неодамна дека неговата приказна со клубот од Минхен по осумгодишна врска е завршена.
Клупското раководство сега е подготвено да дозволи заминување на Левандовски за „реална цена“.
