Пред 2,5 години се соочивме со обесправени доктори и медицински сестри кои учат германски за да заминат во странство, пациенти со ретки болести без лекови, дијабетичари кои не знаат каков инсулин примаат, по две новороденчиња во еден инкубатор, истакна министерот за здравство и претседател на комисијата за здравство на СДСМ, Венко Филипче, на граѓанската трибина „На прав пат“ во Гостивар.
„Почнавме да инвестираме првенствено во луѓето, пред се во младите, за да останат тука да се едуцираат. Дадовме над 5 илјади согласности за вработување за 2 години и нема здравствена установа во земјата, каде бројот на вработени не е зголемен за најмалку 10 отсто, платите беа ниски, со дежурства за смешен надомест и затоа почнавме процес на зголемување на платитие. Минатата година надоместокот за дежурства се триплираше до највисоките 7.200 денари, нагласи Филипче.
Тој додаде дека за 2,5 години платите на лекарите специјалисти се зголемени на 40 отсто, над 23 проценти на медицинските сестри, на младите лекари за над 25 отсто, на здравствени соработници над 15 проценти.
„Нема повеќе турски инсулин, нема лекови без сертификат, нема сомнителни лекови, но има три нови видови на лекови за дијабетес, се зголеми буџетот за вакцини и за 6 месеци ставивме крај на епидемијата на сипаници“, нагласи Филипче.
Тој додаде дека повеќе нема квоти во аптеките, нема гужви и турканици, паника дали ќе се најде лекот, сега секој ден во месецот ги има лековите и истовремено не се зголемија трошоците.
„Освен голем број на вработување во гостиварската болница дадовме над 20 специјализации и се реновираа операциските сали, кои се опремени со најдобра хируршка, а идната година ќе биде набавен апарат за магнетна резонанца“, рече Филипче.