На неколку дена пред распуштање на Собранието пред претстојните предвремени парламентарни избори, новиот Предлог-закон за јавно обвинителство не е ставен на гласање на собраниска седница. Иако формално не е услов за почеток на преговори, Европската Унија повеќепати, преку своите претставници потенцираше дека тој треба да биде изгласан час поскоро.
Законот за јавно обвинителство треба да се донесе бидејќи со тоа ќе покажете промена на начинот на мислење од што е минимумот потребен да се направи за отворање на преговори, кон тоа како да ги искористиме максимално преговорите за промена на нашата држава за младите луѓе да не си заминат, е последната порака од евроамбасадорот Самуел Жбогар, пред почетокот на брифингот со новинари за новата методологија на Европската комисија.
Претходно и еврокомесарот за проширување Оливер Вархеји, при неговата посета на земјава порача дека законот треба да биде изгласан, односно изрази надеж дека сегашниот парламентарен состав ќе даде приоритет на новиот закон за ЈО, консатирајќи дека тоа ќе биде добар знак упатен до земјите-членки.
Жбогар денеска ја парафразира пораката на Вархеји, велејќи дека ЕК не го стави Законот за јавно обвинителство како услов, но е нешто што треба да се направи од повеќе причини.
„Првенствено за граѓаните да веруваат во правда и дека ќе има одговорност за кривичните дела. Бидејќи е важно за повеќе земји членки, како демонстрирање на посветеност за владеењето на правото“, изјави Жбогар.
Дека Законот за ЈО може да биде донесен, денеска потврди и претседателот на Собранието Талат Џафери, кој порача дека и на 12 февруари до 23 часот да дојде усогласен Предлог-закон има процедурална можност да биде ставен на гласање.
„И до 23 часот на 12-ти да биде дојден предлог усогласен има процедурална можност тој предлог да биде претворен во закон. Неспорно, но на крај на мандат пред распуштање на Собрание само да се отвори седница, а неусогласен предлог, и да се претвори во театар е тоа немам намера. Нема потреба од некаква тензична ситуација пред одење на избори“, изјави Џафери.
По однос на Предлог-законот за Јавно обвинителство беше организирана и јавна расправа на кој многу експерти, претставници на граѓанскиот сектор дадоа свој придонес, по што беа организирани и средби на работните групи на политичките партии, но не се постигна напредок.
Односно, ВМРО-ДПМНЕ инсистира на законоско решение што ќе биде изработено од експерти, а министерката за правда Рената Дескоска тврди дека на сегашното решение веќе работеле експерти.
За ВМРО-ДПМНЕ е прифатливо законско решение што ќе го изработат и ќе произлезе од самата експертска јавност која беше вклучена во јавната дебата за Законот за јавното обвинителство, рече деновиве претседателот на опозициската партија Христијан Мицкоски.
Дескоска пак, порача дека законот за ЈО ќе се донесе со или без ВМРО-ДПМНЕ, кога ќе обезбедат 80 пратеници, односно двотретинско мнозинство.
Според неа, со новото законско решение не е загрозено продолжувањето на предметите на СЈО, затоа што овие предмети се веќе трансферирани во Јавното обвинителство.
„Мислам дека желбата кај ВМРО-ДПМНЕ да ги заштити своите членови и поранешното раководство што се обвинети од СЈО, а кои постапки сега продолжуваат, е посилна од потребата да помогнат во евроинтеграцијата на земјата. Значи, клучните точки кои што се отворени се всушност продолжување на постапките за јавно обвинителство и градењето на ефикасен систем во рамките на ЈО за борба против криминал и корупција“, изјави Дескоска непосредно пред завршување на дводневната јавна расправа во Собранието на 29 јануари.
Биљана Богдановска