Информацијата со предлог–постапки и мерки за приближување до европската регулатива, со кои ќе се овозможи царинска контрола при увоз на нафтата и нафтените деривати е меѓу точките од дневниот ред на денешната редовна, 15-та седница на Владата.
Како што соопшти владината прес-служба, Министерство за надворешни работи на седницата ќе ја презентира информацијата за новиот статус на Република Северна Македонија – придружна членка во Меѓународната алијанса за сеќавање на холокаустот (ИХРА).
На предлог на Министерство за финансии, Владата ќе се произнесе за информацијата во врска со склучување Меморандум за соработка заради одржување на финансиска стабилност, за кој се предлага да го потпишат Народната банка, Министерството за финансии, Комисијата за хартии од вредност, Агенцијата за супервизија на осигурување, Агенцијата за супервизија на капитално финансирано пензиско осигурување и Фондот за осигурување на депозити.
На денешната седница, закажана за 12 часот, ќе биде разгледана и информацијата за спроведување на Проектот „Грантова шема за регионален развој и постигнати резултати“ што доаѓа како предлог на Министерство за локална самоуправа.
