Северна Македонија во 2020 бележи Значителен напредок, споредено со периодот пред четири години, се вели во извештајот на Бертелсман индексот за трансформација – БТИ во повеќето од критериумите. Најголем успех е нотиран во Индексот на владеење каде земјава бележи скок од дури 19 места, а на самата листа бележи напредок од 14 места. Во регионот пред земјава е само Црна Гора, а Албанија, Србија, БиХ и Косово се зад нас.
Во Извештајот во однос на Политичка трансформација е нотирано дека Владата се труди да ја врати демократијата и довербата на граѓаните во институциите.
„По 11 години десничарско конзервативно владеење и политичка криза во врска со трансферот на власта, новата Влада е решена да ги преизгради институциите и да ја возобнови демократијата“, пишува во извештајот.
Регионално, Северна Македонија е збирно подобро оценета од Унгарија, Србија, Албанија, Косово и Босна и Херцеговина и бележи значителен напредок во однос на 2018 година.
Што се однесува до индексот на владеење, Северна Македонија е подобро оценета од Бугарија, Полска, Хрватска, Албанија, Србија, Косово, Романија, Унгарија и Босна и Херцеговина.
БДИ прави оценка на земјите во однос на нивната политичка трансформација, економска трансформација и владеењето, а во секои од овие области има повеќе индикатори.
Во извештајот се наведува дека решавањето на тридеценскиот спор со Грција околу името ги остранило главните препреки за интеграција на земјата во НАТО и ЕУ и се додава дека сетот реформи на правосудството има за цел да ја намали политичката контрола и да ја воспостави независноста на судството.
Иако е забележан одреден прогрес за подготвка на македонската економија за заедничкиот пазар на ЕУ, Северна Македонија се уште бележи слабости во сферите на образованието и иновациите, како и во сферата на инвестициите. Како забелешка во извештајот е спомената и преобемната јавна администрација.
Бертелсман индексот за трансформација ги анализира процесите на трансформација на земјите во светот во однос на демократијата и развојот на пазарната економија.
