Миленичето кое беше инспирација за серијалот книги и филмот „Уличниот мачор Боб“ почина на возраст од 14 години, се вели во текст на Гардијан.
Џејмс Бовен го „запознал“ напуштениот мачот Боб во 2007, кога се борел со зависност од дрога и решил да го присвои и да се грижи за него.
Бовен почнал да го носи мачорот со себе додека настапувал на улица во Лондон. Мачорот најчесто носел и марама на себе.
Уличниот изведувач потоа напиша и книга насловена „Уличниот мачор Боб“ за пријателството со мачорот. Книгата достигна огромен успех и беше и преточена во истоимен филм во 2016, во кој Боб и самот е дел, заедно со 6 слични мачори.
Бовен вели дека бил „чудесен“ успехот кој заедно го постигнале, додавајќи дека мачорот сретнал илјадници луѓе и допрел милиони животи.
Немало и нема да има мачор како него. Се чувствувам како да ја снема светлината од мојот живот. Никогаш нема да го заборавам, додава Бовен.
Уредникот на Big Issue, Пол МекНејми вели „Најпрво Боб му го смени животот на Џејмс Бовен, а потоа го смени и светот. Тој беше од голема важност за Big Issue и е голем дел од нашата приказна, како што бевме и ние од неговата“.
Низ годините го следевме неговиот успех и секој пат кога ќе го ставевме на насловна, нашите продавачи беа среќни затоа што тоа значеше дека ќе има редици луѓе кои ќе го купат изданието. Боб претставуваше втора шанса и надеж никогаш да не се откажуваме од некој, вредности кои се врежани во генетиката на Big Issue, додава МекНејми.
Изразуваме сочуство кон Џејмс за загубата на неговиот верен сопатник Боб. Мачорот му го спаси животот и тој го истакуваше успехот кој тандемот го достигна преку книгите и филмот. Бовен рече дека досега немало мачор како Боб и ние се сложуваме целосно, вели за крај уредникот на Big Issue.
А. Н. С.
