Благодарение на твоите напори, пораката на прогресивните сили стана уште посилна, вели поранешниот грчки премиер и лидер на СИРИЗА, Алексис Ципрас, во честитката, преку „Твитер“ до Зоран Заев, додека пак од секторот за меѓународни и европски прашања во грчката опозициска партија, коментираат дека победата на СДСМ е „уште една оптимистичка порака за иднината на регионот“, јави дописничката на МИА од Атина.
Ципрас му честиташе на Заев преку „Твитер“, додека пак од СИРИЗА, преку соопштение ја коментираа победата на СДСМ.
Congratulations @Zoran_Zaev.
Thanks to your efforts, the message of brave progressive forces that fight against nationalism, for social justice and peace in our region, became stronger today. A message not just for the Balkans, but for all of Europe.#NorthMacedonia #elections— Alexis Tsipras (@tsipras_eu) July 16, 2020
-Честитки Зоран Заев. Благодарение на твоите напори, пораката на храбрите прогресивни сили што се борат против национализмот, за општествена правда и мир во нашиот регион, денес стана посилна. Порака не само за Балканот, туку за цела Европа, напиша поранешниот грчки премиер и лидер на СИРИЗА Алексис Ципрас на „Твитер“.
-Победата на Социјалдемократската партија на Зоран Заев на парламентарните избори во Северна Македонија е уште една оптимистичка порака за иднината на поширокиот регион, по онаа од историскиот Договор од Преспа. Претставува победа на напредокот, мирот, соработката и помирувањето, не само во Северна Македонија, туку и на Балканот во целина, соопштуваат од СИРИЗА.
