По 16 години на функцијата народен правобранител, за која мандатот му истекува за месецов, Иџет Мемети ќе замине на нова функција.
Со 61 глас „за“, без ниту еден „против“ или „воздржан“, пратениците денеска го изгласаа за нов член на Советот на јавни обвинители.
Избран со исто толку гласови, негов колега во Собранието ќе стане и адвокатот Љупчо Ивановски.
Пратениците ги изгласаа на предлог на собраниската Комисија за прашања на изборите и именувања, откако тие се пријавиле на огласот распишан од Собранието на 6 ноември годинава. На огласот се пријавиле вкупно 8 кандидати, а Комисијата на седница одржана пред два дена со мнозинство гласови утврдила Мемети и Ивановски да ги предложи за нови членови.
Собранието со 61 глас „за“ денеска ја избра и Павлина Црвенковска за член на Судскиот совет.
