Новоизбраните членови на Државната изборна комисија (ДИК) денеска ќе даваат свечени изјави пред претседателот на Парламентот Талат Џафери. Претседател на ДИК ќе биде Александар Даштевски, а потпретседателка Дитмире Шеху. Членови на комисијата се и Борис Кондарко, Радица Ристеска, Оливер Ристовски, Бобан Стојановски и Кренар Лога.
Мандатот на актуелниот состав на ДИК завршува денеска, а него во изминатиот период го предводеше Оливер Деркоски, а негов заменик беше Шеху.
Новиот состав на ДИК беше избран со консензус на 31. собраниска седница во вторникот. Првиот предизвик на овој состав на ДИК е организирање на локалните избори што треба да се одржат наесен. Претседателот на ДИК Даштевски доаѓа на оваа позиција со поддршка на ВМРО-ДПМНЕ, како и членот Стојановски. Кондарко и Ристеска, на кои ова ќе им биде втор последователен мандат се поддржани од СДСМ како и Ристовски. Кондарко беше член на Комисијата и во други два состави. Дитмире Шеху е предложена повторно на истата функција од ДУИ, а Кренар Лога доаѓа во ДИК како предлог на Алијансата на Албанците.
