На негово излегување од Собранието на Република Северна Македонија имавме прилика на кратко да застанеме со пратеникот на СДСМ од Куманово, господинот Мартин Костовски, пишува Одпрварака.мк.
Истиот брзаше да се врати во родното Куманово и ни соопшти една интересна идеја во врска со секојдневно патување. Костовски кој со семејството живее во Куманово, а до Скопје секојдневно патува со својот автомобил испрати информација и повик до своите сограѓани од Куманово.
Оние кои патуваат во Скопје а особено (пациенти, студенти и генерално секој кој патува до главниот град) дека можат секојдневно тоа да го сторат така што ќе патуваат заедно со него.
Имено негова идеја е, од причина што граѓаните се тие кои учествуваат во покривањето на патните трошоци на пратениците (преку плаќање на даноци) тие да бидат и корисниците на овој превоз.
Пратеникот секој ден ќе застанува близу Основниот суд или Општата Болница во Куманово, каде што било кој кумановски граѓанин кој има потреба да патува во Скопје ќе може тоа да го направи заедно со Костовски, без никаков надомест, а истовремено доколку сака ќе може да поразговара со пратеникот за било каков проблем или прашање што го тангира него како граѓанин.
Така, драги читатели доколку патувате во Скопје и го видите пратеникот Костовски кој тргнал накај главниот град патувајте со него, а ако цените дека има прашања за кои сакате да поразговарате, патувајте и одблизу запознајте го својот претставник!
Притоа на шала истакна дека нема намера да им биде конкуренција на транспортните претпријатија, туку еве со мал гест на дело да покаже дека време е секој носител на функција да биде жаргонски кажано “нормален народски човек”.
За крај ни кажа дека еве прв го крши мразот и поставува нови навики на однесување и се надева дека и другите пратеници, директори, градоначалници па дури и министри ќе ги следат новите навики.
