Европскиот суд за човекови права во Стразбур денеска ја ослободи Германија од одговорност за воздушниот напад врз две цистерни во 2009 година во близина на Кундуз, Авганистан, при што, според неофицијални податоци загинаа над сто цивили.
– Германија по нападот покрена истрага што е спроведена по сите правила, се наведува во образложението на пресудата на Европскиот суд за човекови права.
Со тоа е одбиена тужбата на Авганистанецот, кој во нападот од 4 септември 2009 година изгуби два сина. Тој ги обвини германските власти дека по нападот не направиле доволно за утврдување на околностите што довеле до напад.
Авганистанецот бараше и оштета од 5.000 евра, колку што Германија на име „хуманитарна помош“ веќе им исплати на семејствата на загинатите.
Со денешната пресуда затворена е правната можност за понатамошни жалби. Уставниот суд на Германија минатата година го отфрли барањето на семејствата за исплата на поголема отштета.
На 4 септември 2009 година талибанците во близина на упориштето на германската војска во Кундуз украдоа две цистерни со гориво, по што германскиот полковник Георг Клеин, стравувајќи дека талибанците би можеле да ги искористат цистерните за напад, побарал американската армија да изврши воздушен напад.
Во нападот уништени се цистерните, но и загинаа голем број цивили.
Нападот во Кундуз предизвика голем број реакции и несогласувања во Германија, но и во НАТО.
