Кабинетот на претседателот Стево Пендаровски објави јавен повик за Школата за политики организирана од Претседателскиот центар за политичко образование, што ќе се одржи во периодот од март до ноември 2021 година во рамки на четири едукативни семинари со еминентни предавачи и обучувачи од државата и од странство. Целта на Школата е поврзување на учесниците со различно професионално искуство, кои имаат желба со своите знаења и вештини да придонесат за позитивен развој на општеството.
Како што соопшти Кабинетот на претседателот, учесниците треба да се на возраст од 25 до 35 години, да се државјани на Република Северна Македонија, да го познаваат англискиот јазик, а познавање на друг странски јазик ќе се смета за предност, да имаат истакнато учество во општествениот и политичкиот живот во државата поттикнувајќи позитивни промени, солидни познавања на општествената терминологија, а работното искуство ќе се смета за предност.
– Потребни документи за апликација се пријава која може да се симне од следниот линк, биографија во облик на Europass CV, две препораки од еминентни професори/работодавачи, релевантни за тематиката на Школата, есеј на зададена тема по избор: 1. „Мојот придонес за позитивни промени во нашата држава“ и 2. „Мојата визија за демократскиот развој на Северна Македонија“. Повеќе информации за Школата за политики при Претседателскиот центар за политичко образование се достапни на https://pretsedatel.mk/
Селектираните кандидати ќе бидат повикани на усно интервју. Целосната апликација треба да се испрати најдоцна до 1 март 2021 година на l.matevska@president.mk.
Претседателскиот центар за политичко образование цели да организира инклузивни и пристапни настани кои ќе овозможат сите учесници, вклучувајќи ги и лицата со попреченост, целосно да учествуваат. За повеќе информации за пристапноста на настаните или апликацијата, заинтересираните може да се обратат на l.matevska@president.mk.
Едукативните семинари ќе бидат одржани во согласност со протоколите за работа во време на пандемија со COVID-19, изготвени од Комисијата за заразни болести и усвоени од Владата на Република Северна Македонија.
