На 9 Мај, Денот на Европа, се слават европските вредности, меѓу кои мултикултурализмот и почитувањето на различностите. Понатаму, почитувањето на човековото достоинство и човековите права, слободата, демократијата, еднаквоста и владеењето на правото се фундаменталните вредности на Европска Унија кон кои се обврзани сите земји членки на најдинамичниот и најпрогресивниот сојуз на држави во светот.
Европските вредности се универзални и во голема мера се идентични со фундаменталните човекови права и слободи дефинирани во Универзалната декларација за човекови права.
Како организација за човекови права и слободи, ЦИВИЛ веќе од 22 години неуморно се залага за почитување на човековите права и слободи, правдата, еднаквоста и слободата кои се дел и од европските и од општочовечките вредности.
И оваа година, Денот на Европа, 9 Мај, ќе се одбележи во услови на пандемија со Ковид-19, со акцент на заложбите на ЕУ да придонесе максимално кон заштита на јавното здравје, но и одбрана на човековите права и слободи во услови кога тие се под постојана закана на разни форми на радикализам, говор на омраза, ксенофобија и во време кога дезинформациите и теориите на заговорот се ширеа побрзо и од корона вирусот, феномен што го доби називот инфодемија која стана уште еден облик на загрозување на јавното здравје и на демократијата.
ЦИВИЛ ја истакнува важноста на европските вредности и ги повикува сите поединци, заедници, институции и политички или граѓански организации на сите нивоа во земјава и во Европа, да ги удвојат напорите за одбрана, унапредување и промовирање на тие вредности, на секое место и во секое време.
Членството во ЕУ останува една од највисоките национални цели и стратешки интерес на Република Северна Македонија. Живееме во период на предизвици кога, со прифаќањето и негувањето на европските вредности, секој од нас може да даде драгоцен придонес кон ЕУ интеграциите и кон подобрувањето на животот на сите граѓанки и граѓани на нашата земја, но и на Европа.
Со проектот „Европски перспективи“ ЦИВИЛ ги продолжува и зајакнува уште повеќе напорите кон трасирање на патот кон ЕУ преку учество во креирање политики, подигање на свеста и активизам за европските вредности, мултикултурализам и недискриминација, зyастапување за воведување на европски вредности, мултикултурализам и недискриминација во основните и средните училишта, справување со нарушувањето на информациите и хибридните закани, обезбедување простор и видливост на прогресивните идеи и граѓанското општество, придонес кон реформите во изборниот систем, афирмирање на пописот како статистичка, а не политичка операција.
Во таа насока, ЦИВИЛ, преку инцијативата „Направи разлика: Почитувај ги различностите ги повика јавните личности, уметници, активисти и интелектуалци да говорат и пишуваат за богатството на нашето општество кое го носат различностите и европските вредности, како што се почитувањето на човековите права и слободи, слободата, еднаквоста и правдата.
И да се запомни, сите граѓанки и граѓани имаат можност да се вклучат во промоција и практикување на европските вредности.
Биљана Јордановска / ЦИВИЛ
