Литванија денеска соопшти дека нема да дозволи ниту еден лет, ниту влезен, ниту излезен, да го преминува белорускиот воздушен простор, еден ден откако Белорусија пресретна авион на пат кон Вилнус и го уапси опозиционерот Роман Проташевич кој беше на тој лет.
– Сите летови што одат од или до литванските аеродроми преку белорускиот воздушен простор се забранети, изјави министерот за транспорт Мариус Кудис на владин состанок во Вилнус, пренесува МИА.
Белоруските власти вчера го уапсија опозицискиот активист Роман Проташевич откако авионот во кој се наоѓаше беше пренасочен кон Минск, наводно поради закана за бомба. Авионот на „Рајанер“ летал од Атина за Вилнус. По неколкучасовно задржување на аеродромот во Минск, авионот можел да го продолжи летот, но без опозиционерот и неговата девојка.
