Претседателот на Казахстан Касим-Жомарт Токаев за време на обраќањето до нацијата, издаде наредба да се отвори оган „врз терористите“ без предупредување .
Претседателот рече и дека казахстанските власти немаат намера да преговараат со терористите.
– Од странство се повикуваат страните да преговараат за мирно решавање на проблемите. Целосна глупост! Какви преговори може да се водат со криминалци, со убијци? Имаме работа со вооружени и обучени бандити, рече Токаев.
Казахстанскиот лидер рече дека главниот град на државата бил нападнат од 20.000 „бандити“ и изрази „посебна благодарност“ до рускиот претседател Владимир Путин за испраќањето војници.
Повеќе од 500 цивили, меѓу кои 130 жени и постари лица, беа повредени за време на немирите во Алмати.
Во провинцијата Мангистау, во неделата почнаа протести откако ден претходно беа укинати ограничувањата на цената на течниот гас, популарното гориво за автомобилите, по што цената се зголеми за повеќе од двојно.
Токаев прогласи вонредна состојба во Алмати и провинцијата Мангистау.
Полицијата во најголемиот казахстански град Алмати вчера соопшти дека привела околу 2.000 луѓе во масовните протести.
Во главниот град на Казахстан, Алмати, вчера избувна ново насилство откако Русија во текот на изминатата ноќ испрати падобранци во обид да се задуши граѓанскиот бунт во оваа поранешна советска република.
Очевидци за британските медиуми изјавија дека во пукотницата има повредени. Истите извори велат дека кон плоштадот се движат воени возила.
-Војниците пукаат во демонстрантите и автомобилите на плоштадот на Републиката во Алмати, изјавија очевидци.
Британските медиуми, повикувајќи се на соговорниците од плоштадот, пренесуваат дека војската веднаш го опколила плоштадот и почнала специјална операција без да ги напушти возилата. Тие побараа демонстрантите да го напуштат плоштадот и предупредија дека ќе отворат оган.
извор: МИА
