Украина во периодот од 1939 до 1945 година изгуби над 8 милиони луѓе во Втората светска војна и нема причина да го глорифицира нацизмот, вели украинската амбасадорка во земјава Наталија Задорожњук по вчерашниот протест што се организираше пред Украинската амбасада во Скопје под мотото „Против глорификацијата на нацизмот во Украина“, пренесува Вистиномер.
Од Амбасадата на Украина во Скопје велат дека сакаат да ја искористат вчерашната организирана акција за да информираат дека Русија води војна против Украина на сите фронтови, вклучително и на информативниот.
„Во денешниот свет, информацијата е едно од најмоќните средства за борба. Затоа, за време на руско-украинската војна, ескалацијата на безбедносната ситуација од страна на Русија, со поставување на „луди“ барања кон Западот, Кремљ активно користи хибридна информативна агресија – шири дезинформации, фалсификати, води информативна војна против Украина“, наведува украинската амбасадорка Задорожњук во авторската статија „Вистината секогаш победува“ доставена до Мета.мк.
Амбасадорката пишува дека стара и омилена тема на руската пропаганда, која таа цинично ја користи и упорно се обидува да ја протурка, е да ги прикаже Украинците како нацисти.
Задорожњук потсетува пред Втората светска војна од 4 до 7 милиони Украинци загинале од вештачки предизвиканиот Гладомор од 1932 до 1933 година под владеењето на бруталниот тоталитарен режим на Сталин.
„Стотици илјади настрадаа од „Големиот терор“ – сталинистичките репресии. Поради што во тоа време земаше замав движењето за независност на Украина. Светската војна започна во септември 1939 година, една недела по заговорот меѓу двајца диктатори, потпишувањето на пактот Молотов-Рибентроп“, пишува украинската амбасадорка.
Во Втората светска војна, на страната на советската армија се бореле околу 7 милиони Украинци, од кои преживеале помалку од половина. Во составот на полската армија, се бореле 112.000 Украинци, во армијата на САД до 80.000, на страната на Велика Британија и Канада околу 45.000 и на страната на Франција – 6.000.
Злосторствата на сталиничкиот режим во Украина се величаат од модерна Русија, а својата хистерична антиукраинска кампања ја изгради на принципите „кој не е со нас е фашист“, пишува амбасадорката Наталија Задорожњук.
„Во Русија, од самиот почеток на агресијата врз Украина, се тврдеше дека причината за нејзината инвазија, прво на Крим, а потоа и на истокот на земјата, бил „државниот удар“ и како резултат „неонацистичкиот режим“. Неприфаќање на неповолна позиција за Москва, неприфаќање на другите да си го изберат својот пат е државна политика на Русија“, наведува украинската амбасадорка.
„Ако Украинците не сакаат да живеат како Русите, избираат поинаков пат на развој за својата земја и херојски ја бранат својата земја од руската агресија – ова е неонацизам во разбирањето на Москва, пишува таа.
Амбасадорката на Украина додава дека од инвазијата на Русија во Украина и анексијата на Крим досега загинале околу 14.000 луѓе, 2 милиони луѓе беа принудени да ги напуштат своите домови, а материјалната и моралната штетата нанесена на Украина не може да се пресмета. Задорожњук во статијата коментира дека токму ова се манифестациите на нацизмот во 21 век во срцето на Европа.
Таа потсеќа и на користењето дивјачки методи за борба со противниците – убивање на своите опозиционери во центарот на главниот град, труење на луѓе со полониум, организирање експлозии во други земји, уривање на патничкиот авион Boeing 777 во близина на Доњецк (починале 298 луѓе) и многу други.
„И покрај на сите овие злосторства кои Русија ги изврши против човештвото, Москва се обидува да го убеди светот во опасноста од страна на Украина. Така, ние, Украинците, нашата земја сме најопасната закана за Русија, бидејќи слободната, независната, демократската Украина која се придржува до паневропските вредности е казна за тоталитарниот руски режим“, заклучува во својата статија украинската амбасадорка во Скопје.
Извор: Вистиномер
