Русија и Украина објавија дека не постигнале никаков напредок по еднодневните разговори со француските и германските официјални лица, чија цел беше да се стави крај на осумгодишниот сепаратистички конфликт во источна Украина. Тоа означува пад на напорите за ублажување на пошироката украинска криза, во која Русија распореди повеќе од 100.000 војници во близина на украинската граница.
Рускиот пратеник Дмитриј Козак на доцна ноќниот брифинг по разговорите во Берлин рече дека не е можно да се усогласат различните толкувања на Русија и Украина во врска со договорот од 2015 година, кој имаше за цел да ги прекине борбите меѓу проруските сепаратисти и украинските владини сили.
„Не успеавме да го надминеме тоа“, рече тој.
Украинскиот пратеник Андриј Јермак рече дека нема напредок, но двете страни се согласија да продолжат со разговорите.
„Се надевам дека многу брзо ќе се сретнеме повторно и ќе ги продолжиме овие преговори. Сите се решени да постигнеме резултат“, изјави тој.
Набљудувачите на Организацијата за безбедност и соработка во Европа (ОБСЕ) известуваат за чести прекршувања на договорот, понекогаш со стотици инциденти на ден. Украина соопшти дека од 2014 година се убиени околу 15.000 луѓе.
Претставниците на Русија, Украина, ОБСЕ и двата сепаратистички региони потпишаа договор од 13 точки во Минск во февруари 2015 година, кој беше поддржан и од лидерите на Франција и Германија.
Рускиот министер за надворешни работи Сергеј Лавров вчера ја обвини Украина дека се обидува да го ревидира договорот и да ги избере само елементите кои се најповолни за неа.
Украина вели дека е посветена на договорот./МИА/.
