Шест луѓе однесени како деца од Гренланд во Данска како дел од социјален експеримент денеска добија извинување од данската Влада за вежба што „никогаш не требало да се случи“, jaвува МИА.
Група од 22 деца од Гренланд – од кои шест сè уште се живи – биле земени од нивните семејства во 1951 година и испратени во Данска, во обид да се создадат услови кои ќе им дадат подобар живот. Тие го научиле данскиот јазик и требало да бидат одгледувани да бидат дел од елитното општество со надеж дека ќе одиграат клучна улога во развојот на општеството во Гренланд и Данска.
Сепак, експериментот не одел според планираното. Шест од децата биле посвоени во Данска, но останатите 16 на крајот биле вратени назад на Гренланд, каде што завршиле во сиропиталиште наместо да се обединат со своите семејства.
Данската премиерка Мете Фредериксен упати извинување во името на својата земја на церемонијата во Националниот музеј на Данска во Копенхаген. Таа го нарече експериментот бездушен и нехуман.
Фредериксен веќе се извини за програмата со писмо во 2020 година. Преживеаните од програмата, исто така, добија отштета од околу 250.000 круни (36.500 долари).
Фредериксен планира да упати уште едно лично извинување кога ќе отпатува на Гренланд во наредните недели.
