Повеќе од 70 луѓе се убиени во претходниот период во насилствата во Јужен Судан, соопшти денеска Мисијата на Обединетите нации во земјата, информира МИА.
Мисијата документираше 72 цивилни жртви меѓу 17 февруари и 7 април во округот Лер.
Меѓу жртвите е и локален член на Лекари без граници.
Пријавени се 64 случаи на сексуално насилство, вклучително и групно силување. Напаѓачите се „вооружени младинци“ од соседните области Кох и Мајендит.
– Згрозен сум од овие ужасни напади врз цивили во Лер. Сите ние мора да направиме сè што можеме за да обезбедиме жртвите и преживеаните да ја добијат правдата што ја заслужуваат и да ја добијат грижата и поддршката што им е потребна, рече специјалниот претставник на генералниот секретар на ОН за Јужен Судан Николас Хејсом.
Ограбени и изгорени се пазари, куќи, објекти на хуманитарни организации и магацини.
Се проценува дека 40.000 луѓе избегале од насилството, а илјадници, наводно, го преминале Нил за да се засолнат во друга држава.
Мисијата на Обединетите нации соопшти дека во Лер се распоредени дополнителни мировни сили кои вршат редовни патроли.
Насилството во Јужен Судан е зголемено откако прогласи независност од Судан во 2011 година.