Освен што блокира се што е во интерес на граѓаните, ВМРО-ДПМНЕ предводена од Христијан Мицкоски шири шпекулации и измислува наводни афери со цел да го поктопа функционирањето на институциите, велат од СДСМ во соопштение за јавноста.
„Чиста лага и шпекулација се тврдењата на ВМРО-ДПМНЕ и Мицкоски за наводна афера во работењето на Управата за јавни приходи.
Како што и јавно објави УЈП, станува збор за утврдено незаконско работење сторено од одредени даночни обврзници кое УЈП го открило уште во јули 2021 година при што сите документи и материјали се доставени до надлежните институции и предметот е веќе во предистражна постапка.
Не е првпат ВМРО-ДПМНЕ и Мицкоски преку шпекулации и лажни вести да се обидува да загрози истраги од надлежни институции, на ист начин се обидуваа и да попречат акции и истраги на Министерството за внатрешни работи.
Неодговорното однесување, одбрана на криминалот, блокадите и лажните вести остануваат заштитен знак на ВМРО-ДПМНЕ и Мицкоски“, се вели во соопштението.
