Поради војната на Русија против Украина, а не поради западните санкции, глад ќе погоди дополнителни 40 до 50 милиони луѓе, рече американскиот државен секретар Антони Блинкен во Берлин, каде што се одржува конференција за глобалната криза со храна пред состаноците на Г7.
„Нема други причини освен политички за руската блокада на Украина и, во многу случаи, одбивањето на Русија да извезе сопствено жито“, изјави Блинкен на прес-конференција со германската министерка за надворешни работи Анален Баербок.
Баербок ја повика меѓународната заедница да ги засили напорите за борба против влошувањето на гладот во многу делови од светот и ги нарече потезите на Русија „цинична“ и веројатно дестабилизирачка војна со жито.
Русија свесно „го користи гладот како воено оружје и целиот свет е заложник на тоа“, рече таа, предупредувајќи дека цунами од глад им се заканува на некои земји.
Ситуацијата, вели таа, е „драстична“, со 345 милиони луѓе потенцијално изложени на ризик од глад. Оваа година ќе треба да собере 44 милијарди евра, но само половина од сумата е обезбедена, додаде таа.
Таа ја спореди кризата со глад со „бран загрозувачки по живот“ поттикнат од климатските промени и пандемијата со Ковид-19.
– Но, само со руската инвазија на Украина тој бран стана цунами, рече Баербок.
Министрите на 40 земји се обидуваат да најдат конкретни решенија за кризата со храна предизвикана од војната во Украина на конференција во Берлин./МИА/
