Претседателката на Претставничкиот дом на американскиот Конгрес, Ненси Пелоси, пристигна во Тајпеј, и покрај предупредувањата од официјален Пекинг да не го прави тоа, бидејќи тоа сериозно ќе ги загрози односите меѓу Кина и САД.
Тоа е прва посета на висок американски функционер на Тајван по 25 години.
Претседателката на Претставничкиот дом на САД, Ненси Пелоси, нагласи дека посветеноста на САД за демократски Тајван е поважна од кога било.
„Посетата на нашата конгресна делегација е показател за недвосмислената американска поддршка за демократијата на Тајван“, напиша Пелоси на Твитер.
Таа наведе дека во разговорите со лидерите на Тајван „ќе биде повторена поддршката за американските партнери и ќе биде промовиран заеднички интерес, вклучително и унапредување на слободниот и отворен индо-пацифички регион“.
„Нашата посета не е прва, делегации на Конгресот дојдоа во Тајпеј и претходно. Ова на никаков начин не е во спротивност со американската политика, која е водена од Законот за односи со Тајван од 1979 година“, напиша Пелоси.
Законот за односи со Тајван од 1979 година ги регулира односите на САД со островот, не бара од САД да интервенираат воена во случај на кинеска инвазија, но наложува Тајван да добие ресурси за да се брани, како и да спречи какви било унилатерални промени во неговиот статус од страна на Пекинг.
Кина денеска го осуди „исклучително опасниот“ став на САД, непосредно по пристигнувањето на претседателката на Претставничкиот дом на американскиот Конгрес, Ненси Пелоси, во Тајван, автономна територија што Пекинг ја смета за една од своите провинции.
„САД… се обидуваат да го искористат Тајван за да ја зауздаат Кина“, објави кинеското Министерство за надворешни работи, додавајќи дека Вашингтон не престанува „да го деформира, прикрива и празни принципот на една Кина од секаква смисла, зајакнувајќи ја официјалната размена со Тајван и охрабрување на сепаратистичките активности на Тајван.”
„Тие акции, како и играњето со оган, се крајно опасни“, соопшти Министерството.
Портпаролот на кинеското Министерство за одбрана, Ву Чиан, денеска најави дека Кина ќе започне „целни воени акции“ како одговор на посетата на Пелоси на Тајван.
„Операцијата на војската има за цел одлучно да го одбрани националниот суверенитет и територијален интегритет и цврсто да се спротивстави на странското мешање и сепаратистичките обиди за независност на Тајван“, рече Ву Чиан.
Покрај тоа, Кина најави дека ќе одржи „важни“ воени вежби, вклучително и четиридневна вежба со употреба на боева муниција, во шест региони околу Тајван, објавија кинеските државни медиуми.
Кинеските државни медиуми претходно пред пристигнувањето на Пелоси во Тајван објавија дека борбените авиони Су-35 PLAAF го минуваат Тајванскиот теснец, без да ја прецизираат целта на нивниот лет.
Пелоси е на турнеја низ Азија, која вклучува посети на Сингапур, Малезија, Јужна Кореја и Јапонија.
Ј. Ѓ.
Поврзано:
