Претседателот на Северна Македонија, Стево Пендаровски вечера оцени дека реториката меѓу нашата земја и Бугарија во последниот период е смирена за што како причина ја наведе усвоената преговарачка рамка.
Во емисијата „Топ тема“ на телевизија Телма, Пендаровски истакна дека со неговиот бугарски колега Румен Радев сака да разговара за реални европски теми како што се економијата, инфраструктурата…. За историски теми, како што рече, нема намера да патува во Софија.
Јас и сега тврдам и во наредните години, независно од која позиција ќе бидам, немам намера да одам во Бугарија и да зборувам за историја. Моја стара теза е дека кога зборуваме за евроинтеграции, не смее да се концентираме на историјата. За жал, од 2019 година Софија ја претвори таа тема како предуслов за напредување. Мене ми е драго што во преговарачката рамка, историјата се споменува само во делот на билатерален договор и Комисијата на историчари. За историски теми немам намера да го трошам патот и да патувам во Софија и да разговараме со Радев за окупатори или администратори, истакна Пендаровски.
Тој додаде дека нема добиено мандат во 2019 година за да ја враќа државата во 19 век.
За сè друго немам добиено мандат во 2019 година да ја враќам мојата држава во 19 век или да зборувам за Цар Самоил за 10 или 11 век, нагласи вечерва Пендаровски во „Топ тема“.
