Претседателот на СДА Македонија, Џелал Хоџиќ, на Комеморативната седница за жртвите од геноцидот во Сребреница, во својот говор во македонското Собрание, рече дека „геноцидот е факт а негирањето на геноцидот е неприфатливо“.
Секој ден се сеќаваме, ниту еден ден не забораваме, нагласи Хоџиќ.
„Геноцидот во Сребреница е факт. Негирањето на геноцидот е неприфатливо во едно демократско општество и претставува антицивилизациски чин. Геноцидот во Сребреница беше потврден со судска пресуда на меѓународниот суд во Хаг, како единствен геноцид на европско тло по Втората светска војна.
Денеска сме сведоци на уште една војна во Европа, на руската агресија врз Украина. Да Ве потсетам, пред неколку години Велика Британија поднесе предлог резолуција за најостра осуда на геноцидот во Сребреница, во Обединети нации, а Русија вложи вето на таа предлог резолуција. Неколку години подоцна Русија врши страшна агресија врз Украина. После војната веројатно ќе се утврдува дали е направен уште еден геноцид на тлото на Европа, а цивилизацијата одамна даде завет “Никогаш повеќе!“.
Европскиот парламент го прогласи 11 јули за ден на сеќавање на геноцидот во Сребреница. На 4 февруари 2010 година, Собранието на Северна Македонија усвои декларација за поддршка на Резолуцијата за сребреница на Европскиот парламент. Декларацијата го осудува геноцидот над повеќе од 8000 Бошњаци од овој босански град.
Геноцидот во Сребреница е дел од институционалната меморија на ЕУ, САД, Канада, Велика Британија, Германија… на сите држави каде демократските вредности и почитувањето на човековите права е составен дел од нивните системи. Лани, со едногласни резолуции за осуди на геноцидот се случија во парламентите на Австрија и Албанија.
Сакам уште еднаш да се заблагодарам на претседателот на Собранието, што овозможува и овде во македонското Собрание на достоинствен начин да се сеќаваме на жртвите на геноцидот во Сребреница.
Денес можете да слушнете изјави од сите демократски држави, како сеќавањето на геноцидот во Сребреница е наша заедничка должност. Некој од претходните говорници рече дека Бошњаците ја имаат најголемата болка. Сепак, Сребреница денес е совеста на светот! Светот кој пред 28 години потфрли и дозволи да се случи геноцид, како најголемо воено злосторство во Европа, после Втората светска војна. Убиството на над осум илјади Бошњаци, мажи и деца, е колективен неуспех на целиот демократски свет, што не смее никогаш да го заборавиме. Сребреница е совеста на светот.
Зошто е важно сеќавањето на жртвите од геноцидот на Сребреница да биде институционализирано?
Па уште постојат радикални иделогии и деструктивни политики, кои го негираат геноцидот. Негирањето на геноцидот е последна фаза на самиот геноцид. Оние кои го негираат геноцидот даваат свој труд во злосторството кое го смислиле и реализирале најболните умови“, истакна Хоџиќ во говорот во македонското Собрание.
