Белата куќа синоќа објави дека Илон Маск ќе ја напушти функцијата во Одделот за владина ефикасност (ДОГЕ) како што е планирано подоцна оваа пролет, кога „неговата неверојатна работа“ ќе биде завршена.
-Илон Маск и американскиот претседател Доналд Трамп јавно кажаа дека Илон ќе ја напушти јавната служба како посебно вработен во американската влада кога ќе заврши неговата неверојатна работа во ДОГЕ, објави на својот „X“ профил портпаролката на Белата куќа, Керолин Левит.
Таа ги критикуваше медиумите, повикувајќи се на написот објавен вчера на Политико, во кој се наведува дека Трамп им рекол на својот поблизок круг и на членовите на неговиот кабинет дека „Маск ќе се повлече од сегашната позиција во администрацијата во наредните недели“.
Се очекуваше Маск да го напушти ДОГЕ по 130 дена како „посебен државен службеник“ во мај оваа година. Маск беше официјално ангажиран како „посебен државен службеник“, позиција основана од американскиот Конгрес во 1962 година која им овозможува на извршната или законодавната власт привремено да вработуваат службеници за конкретни краткорочни владини проекти.
Според Политико, Трамп и Маск неодамна се договориле Маск да се врати на своите приватни работи. ДОГЕ беше основан со цел да се намали трошењето на владините агенции, како и да се распуштат оние чии улоги се покажаа како вишок.
