Со температури кои оваа недела ќе надминат над 30 степени Целзиусови, Белгија се соочува со едно од потенцијално најжешките лета, со потопло и посуво време од вообичаеното за овој период од годината.
Како што јави дописникот на МИА од Брисел, белгискиот Кралски метеоролошки институт (КМИ/ИРМ) прогласи „портокалово ниво“ на предупредување за жешко време за утре и в среда, посочувајќи дека до Белгија на почетокот на неделава ќе стигне топла воздушна маса од југ што ќе предизвика невообичаено високи температури на воздухот.
За денеска се предвидува температурите во повеќе делови на Белгија, пред се во јужните и централните области, да достигнат до 32 степени, за утре до 35, а в среда дури и до 37 степени Целзиусови.
Најавите за невообичаено високите летни температури доаѓаат во услови на особено сушната пролет во Белгија, кога во периодот од 1 март и 25 мај наврнаа само 38,91 милиметри дожд, со што овогодишната пролет стана втор најсува од 1892 година, кога започнале ваквите мерења. Посува пролет од овогодишната е регистрирана само во 1893 година.
– Прогнозите за следните четири недели сугерираат дека во јули ќе доминира топло време и со помалку дожд од вообичаеното, изјави метеорологот Паскал Мелие.
Според него, климатските модели сугерираат на потопло и посуво време од вообичаеното во поголемиот дел од Европа.
– Во јули и август се сосема веројатно рекордни температура. Но, сепак засега е прерано да се предвиди каде или кога би можело да се случи тоа, додаде Мелие.
Тој посочи дека ваквите сезонски прогнози засега се експериментални и нивната точност не е толку висока како онаа на двонеделните прогнози, додавајќи дека со овие модели се предвидуваат веројатни, но не сигурни состојби.
Сегашните предвидување на климатските модели на Европскиот центар за среднорочни временски прогнози се дека летово се очекува високиот воздушен притисок над Западна Европа да го блокира протокот на постуден и повлажен воздух од Атлантикот, што го зголемува ризикот од топлотни бранови и суши.
Според Центарот, во периодот од јуни до август температурите во Белгија и во поголемиот дел од Европа ќе бидат над просечните, со голема веројатност за врнежи од дожд под просекот. Особено топол се очекува да биде јули.
Експертите посочуваат дека остварувањето на ваквите прогнози би можело да има сериозни последици по Белгија, особено по рекордно сушната пролет што резултираше со намалување на подземните водотеци и зголемен недостиг на вода во делови од земјата.
Тие нагласуваат дека топлото време побрзо ја загрева почвата со што не само што се поттикнува циклус на екстремни температури, туку се зголемува и веројатноста од шумски пожари, уништување на земјоделските култури и здравствени проблеми кај луѓето.
