Партиите членки на белгиската владина коалиција постигнаа договор за реформи на даночниот систем во Белгија, со кои се предвидува намалување на даночното оптоварување на семејствата со деца и на лицата со ниски примања.
Реформите, кои треба да се спроведат до 2029 година, според белгиската Влада, имаат за цел да ја подобрат куповната моќ на лицата кои работат и на бизнисите.
Со реформите се предвидува даночното олеснување за едно издржувано дете да се зголеми од сегашните 1.980 евра на 2.650 евра во 2029 година.
Се зголемува и делот од приходот кој е ослободен од наплата на данок на личен доход од сегашните 10.910 евра на 15.300 евра. Ова зголемување ќе се спроведува етапно почнувајќи од 2026, па се до 2029 година. Се проценува дека на овој начин на секое вработено лице месечно ќе му остануваат по дополнителни 100 евра.
Реформите предвидуваат и постепено намалување на придонесите за социјално осигурување на лицата со најниски приходи, инструмент познат како „работен бонус“, чиј бруто износ до 2029 година треба да се изедначи со нето минималната плата.
Во, исто време, се предвидува и намалување на посебниот придонес за социјално осигурување на самците, која мерка ќе им овозможи годишно да имаат на располагање дополнителни 365 евра.
Стапката на оданочување на приходите од хонорарите на пензионери кои продолжуваат да работат хонорарно и по пензионирањето ќе се намали од сегашните 50 на 33 проценти, додека за самовработените лица се воведува ново даночно олеснување од 650 евра, кое до 2029 година ќе се зголеми на 900 евра.
Со реформите се воведува и даночно ослободување за лицата кои повремено продаваат нешто преку интернет. Сега на сумата на секој продаден предмет онлајн се наплаќа данок од 33 проценти, а со реформите приходите од ваквата продажба до 2.000 евра ќе бидат предмет на даночно ослободување.
Според белгискиот премиер Барт де Вевер станува збор за досега најголема социо-економска реформа „што Белгија ја видела во овој век“.
– Само набројувањето на се што е договорено трае еден час, изјави Де Вевер.
Тој додаде дека сите мерки предвидени со реформите „не се пријатни“ и дека некои бенефиции „многу постепено“ ќе се укинуваат.
– Разбирам дека ова не е пријатно, но мислам дека сите сфаќаат оти тоа мораше да се случи, додаде Де Вевер.
Покрај некои повластици за пензионерите, со реформите се предвидува и укинување на т.н. „брачен количник“, систем што овозможува префрлање на дел од приходот од едниот на другиот брачен партнер, со што се намалува основата за оданочување.
