Легендарната јамајканска спринтерка Шели-Ан Фрејзер-Прајс објави дека ќе стави крај на својата импозантна кариера по Светското првенство во атлетика кое идниот месец ќе се одржи во Токио, јавија денеска западните агенции.
Трикратната олимписка и 10-кратна светска шампионка рече дека на Светското првенство во Токио има недовршена работа откако се откажа од финалето на 100 метри на ланските Олимписки игри во Париз поради повреда.
„Не добив шанса да го направам тоа што знам дека можам да го направам во тој момент и беше болно. Тоа беше прв пат во целата моја кариера да не стапнам на патеката за да се натпреварувам“, рече 38-годишната Фрејзер-Прајс.
Фрејзер-Прајс се квалификуваше за своето деветто светско првенство, завршувајќи трета на 100 метри на државното првенство на Јамајка. Таа рече дека Светското првенство, кое започнува на 13 септември, ќе биде не само збогум, туку и прослава на нејзината упорност.
„Да се застане на таа стартна линија е огромно достигнување. Навистина едвај чекам да ја прославам историјата, посветеноста и радоста што ми ги даде овој спорт“, посочи Фрејзер Прајс.
