пишува БИЉАНА ЈОРДАНОВСКА
Дали некогаш ќе се задоволи правдата? Во било која смисла на зборот. И дали тоа ќе биде во интерес на граѓаните? Секогаш поставувано прашање, дел од сечија политичка реклама и кампања, но никогаш без поделба на истите тие граѓани по партиска или било која основа. Ако една демократска држава се потпира меѓу другото и на столбот на правдата, како во сопствената декларација ќе го прикачи праведното општество?
Правда за сите против криминал и корупција, за почеток.
Во нашето македонско општество, таа правда беше условена најмногу со нов Закон за Јавно обвинителство што се појави како последица и на пропаѓањето на Специјалното јавно обвинителство и неговата поврзаност со случајот „Рекет“.
Иако потреба од законот се јави поради други фактори кои беа последица од „сваровски“ судството и начинот на работа на самото Јавно обвинителство под палката на претходниот Јавен обвинител Марко Зврлевски, сепак со појавата „Рекет“ копјата се извадија, атмосферата се вжешти, а закажувањето на предвремените парламентарни избори ја извадија сета политичка (не)култура на виделина сосе криминалите и коруптивните примеси.
И се разбира, во име на долгоочекуваната правда, според правилата на игра во нашето демократско општество се изгласа во „5 до 12“.
Честитки за Собранието, ако има за што да им се честита.
Но, честитки и за трпеливоста, колку на владејачката структура, уште повеќе на граѓанките и граѓаните што добија Закон со кој ќе ја задоволуваат правдата.
На ред се судството, правосудството, обвинителство… на ред е државата.
И во тој манир, во пресрет на предвремените парламентарни избори, вечерва ќе се чекори за правда.
Ако повикот на претседателот на СДСМ, Зоран Заев, го анализираме низ призма на моменталните политички и општествени потреби, ќе ја прочитаме јасната порака дека веќе нема компромиси кога станува збор за правдата.
Одговорност, казнивост и професионална, сериозна работа во борбата против корупцијата и криминалот. Нема оправдувања, нема политички/партиски размени, нема скриена амнестија, нема купопродажби со правдата. Една е. Таа е. И за сите е.
Нормално, повикот на Заев е во насока на реформи, ЕУ интеграции, успешни изборни процеси, Едно општество за сите и се разбира, она од што не може да се избега: потенцирање на криминалите на ВМРО-ДПМНЕ, предводена од Христијан Мицкоски. Во овој контекст оправдано со оглед на сите опструкции и блокади до последен момент што ги направи партијата за да си го спаси криминалното членство.
Со национализам, лажни вести, говор на омраза и црна пропаганда не се оди во ЕУ, со што се повторува потребата од чистка во ВМРО-ДПМНЕ од дното до врвот. Или обратно.
„Ве повикувам да се приклучите кон Маршот “Чекориме за правда”. Заедно да чекориме од местото каде се изгласа овој толку важен закон, од Собранието, до местото каде треба да ги видиме конечните правни разрешници – судот!“, истакна Заев на крајот на прес-конференцијата.
„ЕУ мора да мора да го види и препознае овој нов балкански потенцијал“, а во судот „ треба да ги видиме конечните правни разрешници“, вели Заев.
Мора и треба. И толку. Ако ова не се сфати сериозно во продолжување на реформите во правосудство, ЕУ ќе остане далечен сон. А тоа на никого не одговара.
Заев, јасно посочи дека Законот гарантира дека политичарите нема да можат да бираат и именуваат обвинители ниту да одлучуваат за иднината на предметите и оние на СЈО и сите останати што се кријат по фиоки и оние што допрва ќе се отвора.
„Секој што го прекршил законот ќе се соочи со одговорноста. Секој што допрва ќе го прекрши Законот ќе се соочи со одговорност“, вели Заев.
Допрва ќе се види и за одговорноста и за казнивоста. Ама судот, обвинителството и сите правни органи нека му ја мислат – тоа е пораката што се провлекува низ повикот на Заев. Денеска ќе се чекори за правдата. Утре, којзнае…
