За два дена ќе биде објавен повик со кој на селектиран број домашни компании ќе им се овозможи да изготват проекти и планови за инвестирање во слободните зони, најави денеска директорот на Дирекцијата за технолошки индустриски развојни зони (ТИРЗ), Јован Деспотовски.
Повикот, како што информира Деспотовски, се однесува на средни и големи фирми, а целта е да бидат дел од синџирот на набавки, но и да можат да инвестираат.
-Во соработка со Меѓународната финансиска корпорација (ИФЦ) за два дена од денеска ќе објавиме јавен повик со кој на селектиран број домашни компании, средни и големи, ќе им понудиме можност да си изготват инвестициски проекти и планови со кои понатаму би дошле во ранг на зоните и би реализирале свои инвестициски проекти тука. Не само што не се откажуваме од оваа намера, туку ги засилуваме напорите и ќе успееме, истакна Деспотовски на предновогодишниот брифинг со новинарите на кој ги сумираше резултатите од сработеното во изминатите 12 месеци.
