Националниот ансамбл за народни игри и песни – Танец е нашиот идентитетски код и оваа година слави голем јубилеј – 75 години постоење, со низа концерти дома и надвор. Конечно, со радост можеме да го најавиме и последниот, централен свечен концерт од оваа богата јубилејна сезона, што ќе се одржи на 22 декември (недела), во Националната опера и балет, со почеток во 19 часот, истакнуваат од Танец.
На концертот ќе бидат изведени многу музичко-сценски бисери од богатата фолклорна ризницата на Танец, што датираат од различни периоди на делувањето на ансамблот, прекрасните ора и кореографски постановки како „Тешкото“, „Женско чамче“, „Драчевка“, „Свадба“, „Два танца“, „Џамала“, „Пиринско пролетно цвеќе“, „К’лц нога“, „Копачка“, „Беломорски бисер“, „Малешевка“, „Радовишки собор“ и многу други вокални и вокално-инструментални точки, во изведба на вонсериските национални уметници на ансамблот Танец.
„Ќе се пее и игра, ќе се сеќава и празнува. Ќе има и изненадувања. Ги покануваме сите вљубеници на македонскиот фолклор и пасионирани љубители на Танец да не го пропуштаат овој редок музичко-сценски спектакл на безвременскиот Танец. 75 години постоење е јубилеј за почит!“, наведуваат од Танец
Билетите се веќе во продажба и можат да се купат само на Интернет, на сервисот Купи карта.
