Затворска казна од една година и четири месеци му изрече денеска судот во Осиек на Марио Мамиќ, син на поранешниот претседател на загрепски Динамо, Здравко Мамиќ, прогласувајќи го виновен во процесот кој се води за незаконско извлекување пари од најтрофејниот хрватски фудбалски клуб.
На Марио Мамиќ му е изречена и парична казна од 750.000 евра, а притоа на Динамо ќе мора да му ја надомести штетата во износ од 2.08 милиони евра и да ги плати судските трошоци во износ од 70.000 евра.
Покрај него, судот денеска му изрече затворска казна од 11 месеци и на хрватскиот бизнисмен Сандро Стипанчиќ, која ќе биде заменета со општокорисна работа.
Во т.н аферата Динамо 2 за извлекување пари од клубот како дел од злосторничко здружување, заедно со Здравко и Зоран Мамиќ кои се во бегство во Босна и Херцеговина, а на кои им се суди во отсуство, обвинети се и синот на Здравко, Марио Мамиќ, поранешниот директорот на Динамо, Дамир Врбановиќ, бизнисмените Сандро Стипанчиќ и Игор Крота, како и менаџерот Ники Артур Вуксан.
Според обвинителниот акт, во периодот од декември 2004 до декември 2015 година, Здравко Мамиќ заедно со другите обвинети за злосторничко здружување го оштетиле Динамо за 25.8 милиони евра преку склучување фиктивни договори меѓу Динамо и неколку странски компании, како и со издавање фактури за плаќање на непостоечки услуги за трансфери на играчи.
