СДСМ реагираше на отворањето на експресниот пат низ Фаришката клисура, оценувајќи дека ВМРО-ДПМНЕ се фали со капитален проект што бил над 90% завршен уште во време на владата предводена од СДСМ.
„Со задоволство го одбележуваме завршувањето на експресниот пат низ Фаришката клисура – капитален инфраструктурен проект кој беше над 90% реализиран во времето на владата предводена од СДСМ“, велат од партијата.
Станува збор за патен правец долг 10,2 километри, вреден над 33 милиони евра, кој, според СДСМ, е еден од најсложените на оваа траса.
„Со изградба на два тунели, 21 мост, вијадукт, галерија и други клучни конструкции – сите завршени со над 90% во нашиот мандат“, се наведува во соопштението.
Партијата обвини дека новата влада, иако е веќе една година на власт, само се слика со готови проекти.
„ВМРО-ДПМНЕ, по цела година власт, се слика на отворање на пат за кој само санираа едно свлечиште, поставија сигнализација и неколку огради. Толку.“
Од СДСМ порачуваат дека најважно е што граѓаните конечно добиваат модерен и безбеден пат.
„Граѓаните од Прилеп, Битола, Ресен и целиот Пелагониски регион конечно добиваат современ патен правец, важен за транспортот, економијата и секојдневниот живот.“
Во соопштението се наведува и целата листа на инвестиции што, според СДСМ, партијата ги реализирала во време на својата власт:
„Сериозно инвестиравме во патната инфраструктура: експресниот пат Градско – Дреново, реконструкцијата на Плетвар, патот Прилеп – езерото, автопатот Прилеп – Битола како дел од Коридорот 10д. Тоа се реални резултати од нашата посветена политика за подобра инфраструктура и подобар животен стандард за сите.“
СДСМ упати благодарност и до професионалците кои учествувале во реализацијата на проектот.
„Им изразуваме благодарност на сите инженери, проектанти и градежни работници кои несебично работеа на овој проект.“
Во заклучок, партијата прашува: „Владата на ВМРО-ДПМНЕ нема ниту еден свој проект, промовира само проекти на СДСМ. Прашањето е – што ќе прават кога ќе ги промовираат сите проекти на СДСМ?“
На пуштањето на делницата денеска присуствуваа премиерот Христијан Мицкоски, министерот за транспорт и врски Александар Николоски и директорот на јавното претпријатие за државни патишта, Коце Трајановски.
– Го пуштаме во употреба експресниот пат Фариш – Дреново, во должина од 10,2 километри, со вредност од речиси 45 милиони евра – проект што е директна инвестиција во развојот, безбедноста и иднината на овој регион, на државата, на секој граѓанин. Овој пат е од витално значење и за Кавадарци, Прилеп, Битола и за Ресен. Овие пари, не завршија, како во минатото, во нечии џебови, не исчезнаа во провизии, тендери, фиктивни договори. Туку се тука, пред вас. Во асфалтот. Во оваа делница. Во реални, опипливи дела, истакна премиерот.
Поврзано:
