Од Кабинетот на претседателот на Собранието, Африм Гаши вечерва соопштија дека седницата на собраниската Комисија за надзор над работата на Агенцијата за национална безбедност и на Агенцијата за разузнавање, која првично беше закажана за денеска во 17:00 часот, по договор на пратеничките групи преку координативен состанок ќе се одржи на 10 септември.
Од собраниската прес-служба информираат и дека за истиот ден е предвидена и надзорна посета во просториите на Агенцијата за национална безбедност.
-Оваа одлука е во насока на зачувување на дигнитетот и интегритетот на Собранието и како резултат на политичката култура и отворената дебата меѓу сите претставници во Собранието. Таа ја потврдува посветеноста на транспарентност, одговорност и унапредување на демократските процеси во интерес на граѓаните, посочуваат од Кабинетот на Гаши.
Седница со таа точка на дневен ред беше закажана за денеска во 11 часот, свикана од претседателот на Собранието, Африм Гаши, но беше одложена, па беше најавено дека ќе се одржи во 17 часот попладнето.
Претседателот на Комисијата за надзор над работата на Агенцијата за национална безбедност и на Агенцијата за разузнавање Скендер Реџепи-Зејд за МИА потврди дека Гаши вторпат денеска ја закажал седницата на Комисијата со истата точка на дневен ред. Потенцира дека се договориле седницата на Комисијата закажана за во 17 часот да се поништи и таа да се одржи како што претходно се договориле на 10 септември. Повтори дека тој ќе работи како што налага Деловникот. Посочи дека додека е претседател на оваа Комисија, тој треба да ја свика седницата.
Основното јавно обвинителство за гонење организиран криминал и корупција на 2 септември информираше дека по насоки на државниот јавен обвинител Љупчо Коцевски, оформиле предмет во кој се преземаат дејствија на проверки на наводите за следење на премиерот Христијан Мицкоски, како и дека детално ќе бидат испитани и наводите во последните известувања од АНБ. Тим од истражители од ОЈО ГОКК, како што соопштија оттаму, денеска биле примени во АНБ во рамки на предистрагата за наводите за незаконско прислушување, при што била договорена динамиката за спроведување на увидот во документацијата со која располага АНБ.
