Почна 28-тиот меѓународниот фестивал „Денови на комедија“ во Куманово. Вчера свечено беше доделена наградата „Васил Иљоски“ на актерката Весна Петрушевска за нејзиниот особен придонес кон театарската уметност. Петрушевска пред кумановци кажа дека наградата по значење е трета во државата, особено што го носи името на Иљоски.
– Досега сум изиграла 76 улоги, човек. Многу се радувам на кумановската публика, која може да биде многу строга и затоа им посакувам среќа на сите колеги, рече Петрушевска која наградата ѝ ја посвети на нејзината мајка.
Фестивалот го отвори кумановскиот градоначалник, Максим Димитриевски кој рече дека интересот на граѓаните за фестивалот само покажува колку кумановци сакаат театар кој тековно се реконструира.
-Комедијата е уметност што нè обединува и потсетува дека сите се смееме на ист јазик .Ве поканувам сите љубители на театарот да бидете дел од фестивалските вечери и заедно да уживаме во театарската магија, кажа Димитриевски.
Директорот на НУЦК, Сашо Тодоровски рече дека билетите како и секоја година се распродадени.
-Благодарни сме на публиката за интересот и на изборот на театарските претстави. Уште две години и фестивалот ќе слави 30 години постоење. Навистина е восхитувачки и благодарен сум на оние кои пред 28 години ја започнале оваа идеја, рече Тодоровски.
Први пред кумановската публика на првата вечер настапи велешкиот театар со претставата „Госпоѓа министерка“. На годинешниов фестивал ќе настапи битолскиот со „Рибарски Караници“, МНТ со „Бог на колежот“, Театар комедија „Да живее долна дупка“, „Едно предавање“ од Прешево, „На траг“ од Крагуевац, драмата на албански од Куманово со „Грабеж на дијамантот“, струмичкиот со „Петок 13-ти“, театар од Пирот со „Покондирена тиква“ и сатиричниот театар од Софија со „Постојната сопруга“ ќе игра пред кумановската публика. Фестивалот традиционално ќе го затвори театар Куманово со „Разбуди се Тина“. Годинава, стручното жири ќе додели награди за најдобра претстава, режисер, за најдобар актер, актерка, млад актер, споредна улога, сценографија, костимографија.
