Зоолошките градини кои требаше да бидат преполни во сончевите велигденски празници сега се празни и бараат донации, поради последиците од карантинот воведен поради коронавирусот.
Директор на зоолошка градина во северна Германија дури призна дека некои животни можеби наскоро треба да се хранат со други, доколку зоолошката градина сака да преживее.
– Направивме список на животните кои први ќе треба да ги заколиме, изјави Верена Каспари од зоолошката градина Нојмунстер за „Ди Велт“.
Зоолошката градина во Берлин има панди близнаци, но нивните обожаватели можат да ги гледаат само на интернет.
Портпаролката на зоолошката градина Филин Хашмаистер за новинската агенција ДПА изјави дека „пандите близнаци од пандата се многу слатки“.
– Постојано размислуваме дека посетителите треба да ги следат во живо. Не сакаме малите панди да пораснат до моментот кога конечно повторно ќе отвориме, рече таа.
Големи апетити
Госпоѓа Каспери во зоолошката градина Нојминстер рече дека убиството на некои животни за да можат другите да живеат ќе биде последно средство и „непријатно“, но дури и тоа не би го решило финансискиот проблем.
На фоките и пингвините им требаат големи количини свежа риба дневно, истакна таа.
– Ако дојде до тоа, ќе треба да еутанизирам животни, наместо да ги оставам да изгладнат, рече таа.
– Во најлош случај, ќе мораме да храниме едни животни со други.
Зоолошката градина на Каспери припаѓа на здружение, кое не е опфатено од државниот фонд за итни случаи за мали бизниси.
Таа проценува дека загубата на приходите од зоолошката градина оваа пролет ќе изнесува околу 175.000 евра.
Покрај директните апели за јавни донации, германските зоолошки градини заедно бараат владина помош во вредност од 100 милиони евра, јави ДПА.
Германското Национално здружение на зоолошки градини (VdZ) тврди дека зоолошките градини, за разлика од многу други бизниси, не можат да одат во хибернација и да ги намалат трошоците. Животните сè уште треба да се хранат секојдневно и некој да се грижи за нив, додека тропските живеалишта треба да се загреваат над 20 степени.
Шефот на ВдЗ Јерг Јунхолд изјави дека карантинот една типична германска зоолошка градина ја чини околу 500.000 евра неделни загуби.
Зоолошката градина Шенбрун, една од најголемите атракции во Виена, соопшти дека засега може да функционира со она што има заштедено.
Но, на 1 април испрати 70 проценти од своите 230 вработени на тримесечен одмор – период во кој работните места им се заштитени. Австрија има систем „Курзарбајт“ (субвенционирана краткотрајна работа) како што е во Германија, така што повеќето работници не ги губат своите работни места кога нивниот работодавец се соочува со тешки времиња.
На животните им „недостасуваат луѓе“
Некои вработени во зоолошките градини исто така предупредуваат дека кризата има емотивно влијание врз одредени животни, затоа што им недостасува вниманието што обично го добивале од посетителите.
Хашмаистер од берлинската зоолошка вели дека „мајмуните особено сакаат да гледаат луѓе“.
Таа изјави дека фоките и папагалите исто така биле фасцинирани од нивните посетители и оти „за нив сега е навистина прилично досадно“.
Минатата недела, зоолошката градина во Москва, исто така, соопшти дека на нејзините две гигантски панди „сега нешто им недостасува “.
– Тие почнаа многу поактивно да се доближуваат до секоја личност што поминува покрај нивното живеалиште, се вели во соопштението. (МИА)
