Премиерот Заев и Премиерот на Естонија Ратас: Естонија останува со силна поддршка за Северна Македонија за започнување преговори со ЕУ во октомври

Се нижат средбите на која Северна Македонија добива поддршка од европските лидери на највисоко ниво. Премиерот Зоран Заев денеска се сретна и со премиерот на Естонија, Јури Ратас, информира прес-службата на Владата. На средбата, двајцата премиери ги истакнаа пријателските односи меѓу двете земји и изразија подготвеност за нивно интензивирање со проширување на соработката на повеќе планови.

Премиерот Заев му се заблагодари на естонскиот премиер за поддршката и за потпишувањето на Протоколот за пристапување на Северна Македонија во членство во НАТО. На средбата заеднички беше оценето дека самитот на Европскиот Совет во октомври е од суштинска важност за Северна Македонија, кога се очекува да бидат исполнети ветувањата за датум за старт на пристапните разговори, и дека Естонија ќе продолжи со поддршката за Северна Македонија во оваа насока.

Двајцата премиери се согласија дека Северна Македонија во последните две години направи исклучителен прогрес во реформите дома, како и напредок во остварувањето на стандардите во процесот за пристапување во ЕУ, како резултат на одличната соработка со европските институции.

Премиерите на Северна Македонија и на Естонија, Заев и Ратас изразија заложба да ја поттикнат соработката меѓу двете земји на планот на трговијата и информатичкиот сектор, особено заради извонредните искуства на Естонија.