Премиерот на Република Северна Македонија, Зоран Заев, во рамки на 74-тото Генерално собрание на ОН, оствари неколку билатерални средби, меѓу кои со премиерот на Грција, Кирјакос Мицотакис, Претседателот на Кипар Никос Анастијадес, премиерот на Белгија и иден Претседател на Европскиот Совет Шарл Мишел, Високата претставничка за надворешни работии безбедносни политики на ЕК, Федерика Могерини, како и со премиерот на Естонија, Јури Ратас.
Могерини на средбата истакнала дека очекува почеток на преговорите со ЕУ како резултат на заедничкиот успех.
На средбата пак со премиерот на Естонија Ратас, Заев бил информиран дека и оваа членка на ЕУ останува со силна поддршка за Северна Македонија за започнување преговори со ЕУ во октомври.
Премиерот Зоран Заев, како дел од активностите на маргините на Генералното собрание на ОН, се сретна и со Претседателот на Кипар Никос Анастијадес, се наведува во соопштението од Владата.
Заев во разговорот ја нагласи исклучително позитивната и конструктивна улога што Кипар ја одигра во поддршката на процесот и решението на проблемот со името со Грција.
На средбата беше истакнато дека Република Северна Македонија е подготвена целосно да го прифати развојот на пријателски и сеопфатни односи со Кипар во сите области од заемен интерес, особено во делот на економската соработка, зголемување на обемот на трговијата во областите на земјоделството и прехранбената индустрија, туризмот, банкарството и финансиите и во други области.
Премиерот Зоран Заев, како дел од своите активности, оствари средба со премиерот на Белгија, и иден Претседател на Европскиот Совет Шарл Мишел.
Двајцата премиери, како што соопшти владината прес-служба, низ разговорот на средбата потврдија дека Северна Македонија во последните две години направи исклучителен прогрес во остварувањето на реформските процеси дома, како и во остварувањето на стандардите во процесот за пристапување во членство во ЕУ, преку одличната соработка со европските институции.
На средбата, на која присуствуваа и вицепремиерот задолжен за европски прашања Бујар Османи и министерот за надворешни работи Никола Димитров, премиерот Заев го запозна белгискиот премиер Мишел за актуелните активности на Владата поврзани со очекувањата на Европскиот Совет во октомври, Северна Македонија да го добие датумот за отворање на пристапните преговори за членство во ЕУ.
Заев во Њујорк, за време на Генералното собрание на ОН, оствари средба и со Претседателот на Владата на Грција Кирјакос Мицотакис.
Премиерот Заев нагласи дека Владата на Северна Македонија е подготвена за целосно спроведување на Акциониот план за интензивирање и збогатување на соработката меѓу Република Грција и Република Северна Македонија, како што е предвидено со Договорот од Преспа, за кој потенцираше дека е историски чекор и значаен договор за градење добрососедство, поблиска соработка и конструктивни и позитивни односи меѓу двете земји.
Заев нагласи дека за почит е фактот дека Грција беше првата земја-членка на НАТО што го ратификуваше Протоколот за пристапување на нашата земја во НАТО во постапката за полноправно членство која ќе биде финализирана наскоро.
Беше изразена поддршка од страна на грчкиот премиер за отворање на преговори со ЕУ и беше потенцирано дека доследната и навремена имплементација на Договорот од Преспа е клучна за унапредување на односите и обезбедување на европската перспектива за Северна Македонија.
На средбата беше заклучено дека унапредувањето на економската соработка, зголемувањето на трговската размена и директните инвестиции се од заемна корист за сите граѓани од двете држави.
Министерот за здравство Венко Филипче учествуваше на Самитот за универзална здравствена покриеност на ГС на ОН и потенцираше дека Достапна, квалитетна и долгорочно одржлива здравствена заштита со граѓаните во центарот на здравствениот систем е наша долгорочна стратегија, се наведува во соопштението на Влада на Р.С.М.
И. Терзиевска
