Наспроти објавите во неколку медиуми, дека Бундестагот наведува серија услови за Северна Македонија во подготовките за гласањето во текот на вечерната сесија, препораката, сепак, е безусловна. Германскиот амбасадор Герберих, на вчерашната конференција на ЦИВИЛ за изборни реформи, во своето воведно излагање, меѓу другото кажа, дека Северна Македонија создаде успешна приказна и дека тоа треба да биде пример за целиот регион. Освен нашата земја, на консултациите во најголемите парламентарни групи во Бундестагот, на дневен ред била и Албанија која, како земја кандидат, мора да направи огромен број реформи во клучни области. Без оглед на сериозните забелешки на сметка на прогресот на Албанија, најголемите парламентарни групи, сепак, решија да препорачаат почеток за преговори и за оваа земја, пред гласањето на седницата на Бундестагот вечерва.
„Северна Македонија создаде успешна приказна на Западен Балкан, особено во однос на зближување на регионот. Северна Македонија моментално нема проблеми со своите соседи. Северна Македонија направи голема разлика во историската димензија со Преспанскиот Договор. Тоа треба да претставува пример за целиот регион“ – рече, меѓу другото, амбасадорот Герберих.
Понатаму, амбасадорот Герберих ја истакна посебно важната улога на Парламентот , вклучувајќи ги, исто така, гласовите на опозицијата, во продлабочувањето на процесот на реформи.
„Овие напори треба да се засилат и да дадат опипливи резултати за секој граѓанин. И овие напори мора да ја вклучат реформата на изборниот систем. За таа цел, општеството – ова се однесува и на сите делови од вашето општество, вклучувајќи ги сите етникуми – мора да се обедини и сите тесно да работат заедно за да се надмине сé уште постоечката, а понекогаш и зголемена, поделеност на општеството. Тука би сакал да оддадам почит на улогата на претседателот Пендаровски, чие мото секогаш е дека е тој претседател за сите“ – рече Амбасадорот на Сојузна Република Германија на Конференцијата што ја отворија тој, заедно со претседателот Пендаровски. На отворањето на конференцијата на која учествуваа над 110 претставници на политичките партии, институциите, граѓанското општество, градоначалници, со видео обраќање, учествуваше и премиерот Зоран Заев, со оглед на тоа што истовремено учествуваше во Њујорк, на 74. Заседание на ОН.
Од дипломатски извори во Брисел, неофицијално дознаваме дека во огромно мнозинство се земјите-членки што, практично безусловно, ја поддржуваат Северна Македонија во пресрет на октомвриската одлука за почеток на преговорите. Сигналите што ги упатува Германија во овој процес не се решавачки, но сигурно се значајни. Вечерашната конечна одлука на Бундестагот е сосема извесна и безусловна, што за нашата земја претставува еден огромен чекор напред во таа смисла.
Џ. Дерала
Discussion about this post