пишува: БРАНКО ТРИЧКОВСКИ
Слободан Унковски е Индијана Џонс во потрага по светиот грал на значењата, на слободата и на радоста, во “пештерите” на театарот. Убаво ја фати таа паралела, Јовица Михајловски на вечерашната перезентација на дебелата книга (2.262 грама) на Зоја Бузалковска “Разговори со Унковски” во преполната сала на Кино Култура во Скопје.
И ми ја украде идејата, зашто јас сакав, не таму, туку на овој ѕид, да кажам дека Унко е Слободан Македонски во откривањето и освојувањето на новите светови со молив и гума, со мисла и реч, со визија и љубов и дека е повреден од сите коњаници во поширокиот центар на Скопје. Тој би можел да биде преамбула на новиот устав на Северна Македонија или, тоа е сега актуелно, стратегиски советник за културна деконтаминација и рехабилитација на човекот во Македонија.
Прекрасен есеј за книгата и за Унковски ни прочита Искра Гешовска, гостите од Белград, Бранко Цвејиќ и Воја Брајовиќ, на велелепен начин, со многу топлина и љубов, премрежени низ безбројните творечки искуства со Унковски, говореа за големиот режисер и човек. Вечерта ја заклучи авторката на книгата- феномен, создавана цели дваесет години, ученичката на Унковски, режисерката, Зоја Бузалковска, со убава реч за тоа исклучително творечко патешествие во кое низ блиска интеракција со Унко и со користење на неговата богата архива, која е издашно вткаена во книгата, е направено оваа феноменално издание.
Од презентацијата и од лефтерното прелистување, лесно го забележав авторскиот ракопис на Филип Унковски и на неговата агенција во графичкото уредување на книгата
Немав со себе 1.500 денари така што не ја купив книгата. Не се почувствував посрамемо во тој момент, но кога од Бузалковска чув дека Министератвото за култура, во 2008 и не знам уште во која година, значи, два пати, го одбило финансирањето на овој проект, ме фати срам. Фино рече Воја Брајовиќ: Лесно му е на Унко да биде најдобар во Европа, ај да го видам кај е во Македонија. Јовица, како да знаеше што ќе каже Воја, па уште пред тоа рече, на шега за Унко и како критика за Македонија, дека чека на Војдан Чернодрински за животно дело.
Честитки за Унковски и за Бузалковска и фала на Гешовска, Брајовиќ, Цвејиќ за прекрасната вечер.
