Во недела 3 ноември, како дел од активностите на Општина Прилеп за одбележување на „3-ти Ноември“ – Денот на ослободувањето на Прилеп, ќе биде откриен споменикот „Жртви на фашизмот“ во месноста Дабница.
„Споменикот за „Масакрот во Дабница“ ќе биде откриен утре (недела 3 ноември) во 9ч. по повод ,,3 -ти Ноември,“ -Денот на конечното ослободување на Прилеп.
„Честитки за градоначалникот Илија Јованоски и директорот на Завод и музеј Прилеп, Благоја Атанасоски што експедитивно ги вратија обележјата на НОБ во Прилеп, скриени и уништени: бистата на Тито во меморијалниот музеј,, 11 Октомври,, орденот Град -Херој, одликување врачено од Ј.Б.Тито и сега споменикот „Масакрот во Дабница“ што стоеше уништен, фрлен, заборавен.
Денешната слобода ја добивме со жртвите на нашите сограѓани, храбри борци во НОБ. Вечна слава и поклон до земја! Честит и вековит празник за вековит Прилеп!“, напиша Моника Талеска на својот Фејсбук профил.
Масакрот кај Дабница, е извршен на 19 септември 1942 кај прилепското село Дабница од страна на фашистичкиот-бугарски окупатор. Во масакрот настрадале 19 луѓе.
Статуата излеана во бронза, е дело на првиот академски образован скулптор од Македонија, Димо Тодоровски (1910 – 1983), која долго време стоела во чест на загинатите, била отстранета и загубена во 2002 година, а спомен обележјето оставено запуштено.
Вредно е да се спомене дека група ентузијасти во 2014 година на иницијатива на „Пактис“ од Прилеп и како дел од проектот „Граѓански активатор“ на здружението „Плоштад слобода“ – Скопје, извршија чистење и отстранија голем дел од ѓубрето на локацијата околу спомен обележјето.
Иницијативата вклучуваше барање за обнова и реставрација на скулптурата за „Масакрот кај Дабница“, од страна на надлежните и нејзино повторно поставување на празниот постамент. – Уредување на спомен обележјето и околината.
Едит (3.11.2019)
Стариот сквернавен споменик од бронза, е пронајден во делови и многу оштетен, но ќе биде составен и поставен во Меморијалниот музеј 11 Октовмри, изјави градоначалникот на Прилеп Илија Јованоски.
Новиот споменик дело на скулпторот Сашо Попоски е изработен од полимер бетон.
Фото галерија од откривањето на идентичната реплика од скулптурата на споменикот „Жртви на фашизмот“
Ј.Ѓ
