Сојузот на борците од НОБ од Тетово и граѓаните продолжувачи најавуваат дека после долг период Денот на ослободувањето на градот 19 ноември ќе се одбележи со пригодна свечесност, наместо досегашната практика со положување цвеќе пред Споменикот на револуцијата, пренесе МИА.
Свеченост ќе се одржи во пресрет на Денот на ослободувањето, во понеделник 18 ноември во вечерните часови, под паролата “75 години слободно Тетово-заедно да ја славиме храброста, непокорот и слободата на нашиот град“.
-После долги децении Тетово достоинствено ќе го одбележи 19 Ноември – Денот на ослободувањето на градот. Бидејќи Тетово е заедничко за сите тетовчани, се организираме самоиницијативно без разлика на нашата возраст, занимање или општествени и политички погледи, за заедно да ја славиме храброста, непокорот и слободата на нашиот град и народ. Во предвечерието на славното ослободување, на 18 ноември во НУ Дом на култура „Иљо Антески – Смок“ во центарот на Тетово ќе се одржи уметнички перформанс со почеток во 19 часот. Претходно, во 18:30 часот ќе биде отворена изложба на портрети на борците од НОБ – уметнички дела на академскиот сликар Павле Кузмановски, најавуваат организаторите.
Следниот ден, вторник 19 ноември пред Споменикот на револуцијата во Тетово ќе биде одржана свечена церемонија со полагање цвеќе.
