Во октомври годинава продолжи трендот на намалување на просечната каматна стапка на вкупните кредити и таа се сведе на ниво од 5,05 проценти, додека просечната каматна стапка на вкупните депозити изнесува 1,28 проценти, покажуваат податоците на Народната банка, пренесе МИА.
Во споредба со минатиот месец, каматната стапка на вкупните кредити на домаќинствата во октомври е намалена за 0,03 процентни поени и изнесува 5,78 проценти. Месечното намалување произлегува од падот кај сите каматни стапки. Во однос на октомври 2018 година, просечната каматна стапка на вкупните кредити на домаќинствата е пониска за 0,37 процентни поени.
Просечната каматна стапка на вкупните депозити на домаќинствата изнесува 1,25 проценти и овој месец се намали за 0,07 процентни поени. Притоа, овој пад е под влијание на намалувањето на каматните стапки кај денарските депозити без валутна клаузула и депозитите во странска валута во услови на непроменета каматна стапка кај денарските депозити со валутна клаузула. Споредено на годишна основа, просечната каматна стапка на вкупните депозити на домаќинствата е пониска за 0,14 процентни поени.
