Албанското обвинителство издаде 17 налози за апсење со обвинение за убиство и злоупотреба на службената должност, поради смртта на 51 лице во земјотресот со јачина 6.4 степени минатиот месец, кога се урнаа повеќе десетици згради, соопшти полицијата, додавајќи дека девет лица се уапсени денеска, пренесе А1он.
Полицијата и обвинителството наведуваат дека првобитните истраги покажале дека една од причините поради што настрадаа луѓето во урнатите згради, било тоа што градежниците, инженерите и инвеститорите не се придржувале по правилата, нормите и стандардите за безбедност при изградба, пренесува Ројтерс.
Од деветмината уапсени, двајца се сопственици на два хотели кои беа уништени во Драч, при што загинаа четири лица, а третиот уапсен е менаџер на хотелот кој е наменет за одмор на полицијата, а каде загина високо рангирано полициско лице.
Полицијата наведува дека и двата хотела на плажата на Јадранско море се изградени нелегално, а третиот е легализиран нелегално.
Се наведува дека некои од 17-те лица кои ги бара Oбвинителството побегнале по земјотресот на 26-ти ноември.
