Само процесот на прочистување во судството ќе донесе позитивни резултати. Затоа повикувам на просчистување во правосудството, како што во моментот се прави прочистување и проверка на Владата, на премиерот, на министри, заменици министри, директори…Тоа е дел од овој трансформативен процес, истакна премиерот Зоран Заев одговарајќи на прашање на денешната прес-конференција во Владата. Тој појасни дека со прочистувањето ќе се оделат сите чесни судии и обвинители од оние што се нечесни или не треба повеќе да работат во правосудството, пренесе МИА.
-Уште еднаш кажувам, тоа не е ветинг. Ветинг прави Албанија. Ние не сме на тоа ниво стигнати. Ние треба да направиме едно прочистување. Зошто? Од сите оние чесни судии и обвинители треба да се оделат сите нечесни. Можеби се чесни, но имаат судир на интереси, кој што не е дозволив. Некои можеби немаат судир на интереси но имаат недозволива имотна состојба и пари која што претставува индикативна за сериозноста на самите процеси, рече Заев.
Премиерот појасни дека преку Советот за реформи ги утврдиле и доставиле до Парламентот законите од областа на правосудтсвото, и веќе со консензус е донесен Законот за судски совет, Закон за судовите, Закон за антикорупција. Фазата на имплементација, како што рече, сега зависи од поединците.
-Оттука, немешајќи се воопшто во судските одлуки и во одлуките на јавното обвинителство, можам да кажам дека само процесот на прочистување ќе го даде резултатот. Благодарение на гласноста, благодарение на слободата, на демократијата, денеска процесите се јавно и транспарентно изразени, додаде тој.
Според премиерот Заев, правдата е унапредена во државата. Тој појасни дека никогаш вака гласно не се зборувало и не се гонело подеднакво без разлика дали некој е близок до власта или е близок до опозицијата, но као што рече, работите уште треба да се менуваат.
-Ние направивме големи исчекори. Но, далеку од доволно е тоа. Мора работите да се менуваат во државата заради тоа што горчината за неправда ги погодува граѓаните, но таа неправда верувајте ги одвратува инвеститорите домашни и странски, ги разочарува младите, па заминуваат надвор од државата. Затоа е многу важно од секој можен аспект, правната држава и владеењето на правото е императив на кој што мораме да бидеме сите насочени, истакна премиерот.
Тој рече дека е благодарен оти Антикорупциската комисија од јануари ќе почне и со прочистување во правосудството и додаде дека Управата за приходи, Катастар, Централниот депозитар, Централниот регистар имаат законски надлежности да проверат потекло на пари, имот, капитал на судии и обвинители, на нив лично или на нивно семејство и никој тоа не им го брани.
Прашан за став во однос на тоа дека лидерот на ВМРО-ДПМНЕ Христијан Мицкоски, најави дека ќе објави бомби, тој рече дека секој што поседува докази дали се тоа видео, ауидио разговори, материјални докази е должен да ги пријави.
