Аријана Коскарова, основачка на центарот „Creative Hub” во Скопје и Приштина кој оваа година се најде на листата на Форбс под 30 години, и воедно и организатор на „Балкански претприемачки самит”, е добитничка на награда за жени претприемачи на Светскиот економски форум во Давос.
Станува збор за најголемиот политички и економски настан во светот, „Светскиот Економски Форум” во Давос кој заврши во петокот. Коскарова, претпоследниот ден беше и спикерка на технолошкиот парк во склоп на форумот.
Коскарова е и автор на финтек апликација со успешен екзит во Хонг Конг како и член во бордот на две блокчејн компании од Монако и Лондон, а до крајот на годината токму во соработка со блокчејн компанијата Модекс го отвора и хабот Блокчејн Македонија.
„Особено ми е драго што најпрво Македонија имаше спикер на Технолошкиот Парк во склоп на Светскиот Економски Форум. Покрај најуспешните луѓе во светот имате и млади претприемачи жени од Македонија што е доволен пример дека ние го менуваме светот. На Форумот зборувавме за женска економија, за интегрирање на жената во бизнис светот, за поддршката меѓусебна преку асоцијации, мрежи на контакти, за формирање на фондови каде жени инвестираат во жени, а истиот ден токму од Давос, најголемата банка Голдман Сакс најави дека нема да инвестира во компании доколку во бордовите нема ниту една жена. Како жени мораме меѓусебно да си помагаме, да учиме од примерите, да бидеме подобри и да помагаме и на други да развијат претприемачки кариери. Јас се надевам дека мојот успех ќе биде доволен мотив за сите, во иднина Македонија да има уште повеќе спикери на најголемиот политички и економски форум во светот, заота што само така ќе можеме да направиме разлика и успех на нашата земја. ”, изјави Коскарова на Светскиот економски форум во Давос.
