Техничката Министерка за труд и социјална политика Рашела Мизрахи „свесно“ влегува во скандал. Таа, пречекорувајќи ги своите надлежности и без согласност на заменската министерка Санела Шкријељ, како што може да се види од доказите со кои располага Фронтлајн (во прилог, под текстот), Мизрахи го вработила лицето Марио Тавиќ, како шофер во Министерството за труд и социјала.
Тоа и немаше да биде којзнае колку интересна вест, нели, освен што министерката Мизрахи ги пречекорува своите овластувања секојдневно, ако Марио Тавиќ и претходно не ѝ беше познат на јавноста.
Лицето Марио Тавиќ на македонската јавност ѝ е познат како шоферот што неколку пати ја смени својата изјава по скандалозната сообраќајка во кој учествуваше поранешниот министер за труд и социјална политика, Диме Спасов, од режимот на Груевски.
Да се потсетиме… Прво, Диме Спасов рече дека тој управувал со Туарегот за време на инцидентот, потоа, по неколку часа, Марио – неговиот шофер, сам се пријавил дека не Димче, туку тој управувал со возилото во моментот кога се случил инцидентот, а запрашан од полициските службеници да го опише настанот, Марио немал појма како и што се случило, па пак ја сменил изјавата. Извесната Тамара, „ни крива, ни должна“ три пати ја менуваше изјавата, а министеричот Диме Спасов јавноста не можеше да го најде „ни под дрво, ни под камен“ сè додека не се појави снимката, на која се гледа дека тој Димче е фатен жив како се сами со Тамара за време на инцидентот.
Сигурно се сеќавате на тој циркус со кој се подбиваше јавноста и социјалните мрежи го именуваа Диме „побегуља“ Спасов. За уште да е поголема драматиката и тоа да добие уште поподбивлив шмек, капак беше кога Димче тврдеше дека го бркале „албански терористи од Серава“, и какви ли уште не смешки се изнаслушавме.
Свежи се сеќавањата и на купиштата мемиња на социјалните мрежи со сатирични содржини за „терористите од Серава“ за потоа таа фраза да се удоми и да се користи кога се сака да се исмее некоја банална лага.
И ете ти ја сега, техничката министерката Мизрахи, како повторно ни ги враќа сеќавањата на траги-комичната драмолетка и го враќа Марио повторно на исто работно место во истото министерство и тоа незаконски, да не речам – со сила.
Добро, не можеше ли да му се најде друго работно место на Марио кога веќе нели тој се „фрлал во оган“ за својот шеф, па мораше повторно да го влечкате неговото име по медиуми, а нели неговиот грев е „само“ тоа што сакал да му помогне на својот шеф да се спаси од скандалозната ситуација во која сладострасниот зет на Лазар Колишевски се насадил?
А можеби техничката министерка Мизрахи и не се сеќава на овој скандал, туку е и самата жртвувана за некоја поголема слика. Кој ќе ти ги знае тие вмровски работи?
Ајде, останува да го следиме текот на настаните, можеби ќе паднат уште шеги.
