Со пуштање на лантерни (книжни балони со свеќи) утрово во 6 часот започна меморијалниот марш од скопското село Ласкарци, во помен на 16 лица кои ги загубија животите во автобуската несреќа која се случи точно пред една година.
Маршрутата долга 55 километри се иницираше од група планинари и е поддржана од општина Гостивар. „Покрај сеќавање на жртвите во трагедијата, со овој марш сакаме да испратиме порака до надлежните државни институции да ги преземат сите неопходни мерки за поголема безбедност во патниот сообраќај и упатуваме апел до надлежните институции до крај да го расчистат овој случај и да се дознаат причините кои доведоа до трагедијата”, изјави градоначалникот на општина Гостивар, Арбен Таравари од местото на трагедијата каде и започна утринскиот марш, а кој е предвиден да заврши во 17:30 во Гостивар.
На денешен ден 2019 година, во попладневните часови во сообраќајна несреќа на автопатот Скопје-Тетово, од коловозот излета автобус на компанијата „Дурмо Турс“ кој превезуваше патници на редовна линија од Скопје кон Гостивар. Во оваа трагедија животите ги загубија: Бобан Аврамовски, Трпана Јаневска, Дејан Ристоски, Онур Садику, Есат Емрули, Ајдин Исмаили, Раметула Абдураими, Валдете Хамити, Арсе Арсоски и Ерза Османи Јовица, Трпевски, Бесим Фетаи, Бејза Узеири, Зоран Давидовски и Павле Костоски.
За овој случај, веке се води судска постапка против седум лица, од кои шест лица за „тешки дела против безбедноста и луѓето во имотот и сообраќајот“, а седмиот е обвинет за „несовесно работење во службата“.
А. Зеќири
