СДСМ денеска во 18 часот ќе одржи марш под мотото „Чекориме за правда“. Рутата ќе се движи од Собранието до судовите.
Претседателот на СДСМ, Зоран Заев, во неделата, ги повика сите граѓани кои се за правда, правичност и силна правна држава да се приклучат на маршот.
Заедно ќе продолжиме напред, додаде тој, со одлучни чекори за вистинска и неселективна правда. „За европска перспектива, но и одговорност за сите кои го прекршиле законот! За напредок, развој и членство во НАТО и ЕУ“, рече Заев.
Денеска и генералниот секретар на партијата Љупчо Николовски ги повика сите правдољуби граѓани да им се приклучат на маршот за правда.
– Нашата заложба за градење на силни, независни и професионални јавни обвинителства – успева. Собранието со потребното мнозинство пратеници го усвои Законот за јавно обвинителство. Ставивме уште еден темел на неселективната правда и на правосудство кое гарантира одговорност и казнивост за секој којшто го прекршил законот – порача Николовски.
Тој им честита на пратениците кои го поддржаа овој Закон и смета дека огромното мнозинство во Собранието покажа дека иднината на земјата е поважна од партиските тактики. Нема веќе простор за криминални структури и за политичари кои поддржуваат криминални интереси.
– Тие што се дрзнаа да го кочат напредокот на државата – изгубија! Извршителот Мицкоски и неговиот шеф Груевски се поразени од пратениците, од народот, од СДСМ и од сите политички и граѓански сили кои и мислат добро на сопствената земја. Правда ќе има, правдата доаѓа – порача Николовски.
– Затоа, ве повикувам денеска со почеток во 18 часот да се приклучите на Маршот „Чекориме за правда“ – додаде тој.
„Чекориме за правда“ се организира откако пратениците пред распуштањето на Собранието поради предвремените парламнетарни избори што треба да се одржи на 12 април го изгласаа Законот за јавно обвинителство, кој иако не е услов за почеток на преговори со Европската Унија, сепак високите европски претставници се споменуваше како позитивен сигнал кој би можел да го придвижи процесот.
Поддржувачите на законот тврдат дека во него нема скриена амнестија за никого и секој за кого постои обвинение ќе одговара пред институциите, согласно законите.
Граѓанка која планира да чекори на овој марш вели: „Ќе чекорам за да ги видиме протагонистите од бомбите таму каде што им е местото“. Друг граѓанин истакнува: „Ќе чекорам во марш повикан од една политичка партија за да им покажам на сите политички партии дека граѓани можат да собираат само кога маршираат и работат за правда и владеење на правото, а не за фашистички собири каде се плука по правдата и се штити криминалот.“
Б. Богдановска
